Le ciastel de Tor

Por tröc secui alalungia, cina al ann 1803, é San Martin de Tor sté lié ala storia dl ciastel de Tor. Cina dailó é le ciastel sté la sënta dla Signoría de Tor. La Signoría de Tor se destenô plü o manco sura döta la pert ponënta dla Val Badia, da Peraforada cina al Piz de Pöz, tolon ite ince les localités de Picolin y Ju sön la pert lovënta dla valada. Sön la pröma storia dl ciastel de Tor ne savunse tan co nia. Patrun dla Signoria y dl ciastel ê le vesco de Porsenú che ê gnü cherié l'ann 1027 prinz dal imperadú Conrad II. Bunamënter án costruí le ciastel defata dô la fundaziun dl prinzipat de Porsenú. Documenté vëgnel le pröm iade l'ann 1260, mo bele dan chësta data â le vesco surandé la Signoria sciöche feud ai signurs de Schöneck. Chisc l'á venüda, tla pröma pert dl 1300, a Randold de Téis. Tla secunda pert dl 1300 é la Signoria passada tles mans di Stuck, spo de Ezelin de Wokenstein y plü tert di signurs de Villanders. Le vesco Berchtold de Bückelsburg l'á finalmënter indô surantuta - adöm cun le ciastel - l'ann 1426, y da dailó inant n'é le ciastel mai plü gnü lascé ia sciöche feud arpabl, mo gnô aministré da en capitan che podô ince gní sostituí. Al é romagnü cina l'ann 1803 - ann dla secolarisaziun - pert integrënta dl prinzipat de Porsenú. L'ann 1808 é le frabicat gnü cumpré da döes families de San Martin; i descendënc de chëstes á vit cina tl ann 2000 tl ciastel.

Dal 2001 éle tl ciastel le museum provinzial por la minoranza linguistica ladina „Museum Ladin Ciastel de Tor“.